歐冠：PSG專恰意兵搶W冇蘭度_東方日報

另一場歐聯大戰，巴黎聖日耳門主場迎戰AC米蘭，PSG上輪歐聯1比4大敗喺紐卡素腳下，現時喺「死亡F組」1勝1負排次席，為爭出線要加多兩錢肉緊，佢哋近3次歐聯對意甲球隊全勝，主勝睇高一線，對手A米剛喺意甲大戰輸畀祖雲達斯，仲未回到氣又要火併PSG，再輸唔奇。■（Now 643周四凌晨3時直播）

PSG今季踢走美斯同尼馬，基利安麥巴比成為真正核心，仲請嚟安歷基執教，目標直指歐聯，上場大敗喺紐卡素腳下可謂當頭棒喝，不過總算及早發現問題，球員執番正作戰態度，其實都係好事。PSG最近兩場法甲均大勝對手重回正軌，加上早前踢國際賽，「麥總」同箭頭干卡路拉莫斯都有「士哥」，證明狀態對辦，今仗主場出擊贏波機會高。

AC米蘭士氣低沉
AC米蘭今屆歐聯表現平平，分別對紐卡素同多蒙特都踢成0比0，仍未打開勝利之門，估計今仗作客PSG會踢守勢足球，對佢哋最為不利嘅係剛喺意甲激戰祖雲達斯，喺10人應戰之下，最終輸0比1，失利之餘球員仲耗力唔少，嚴重打擊士氣，今場就算死守都好，恐怕都頂唔住對方攻勢，落敗屬意料中事。