德甲：鋒力強勁開波即搶 拜仁半Ｗ執到堡_東方日報

德甲歇冬前最後一輪，禾夫斯堡主場迎戰拜仁慕尼黑。班霸拜仁今季面對近年最嚴峻挑戰，佢哋同利華古遜、RB萊比錫、史特加等競爭激烈，今仗絕對不容有失。拜仁近年對賽食住禾夫斯堡，而且經常早開紀錄，今仗可以直取半場客勝。（Now639周四凌晨3時30分直播）

拜仁今季表現平穩，未能做榜首「過冬」只因利華古遜戰績更加突出，拜仁繼續依賴強大鋒力輾壓對手，王牌前鋒哈利卡尼已經有20個聯賽入球，鋒力好得人驚，球隊就算作客亦會貫徹搶攻風格，近4場聯賽作客嘅頭20分鐘內就攻入5球，經常用快刀斬亂麻戰術，殺對方措手不及。

對賽往績禾堡捱打
禾夫斯堡上仗小勝達斯泰特，但係後防主力麥辛斯拿確斯攞紅牌要停賽，大大削弱球隊抵抗拜仁嘅能力。拜仁對上11次對禾夫斯堡取得10勝1和壓倒性優勢，踢法明顯剋住對手，搶韁戰術成效甚佳，近5次交手拜仁都順利喺半場領先，今仗一於再追半場客勝。