英超：賓福特叉足電撲擊狼隊_東方日報

今晚尚有兩支英超弱隊交鋒，賓福特主場對狼隊；經歷聯賽3連敗嘅賓福特，多得上輪對手曼城出戰世冠盃，需要改期，令球隊獲得喘息機會，變相有較多時間休息及備戰，叉足電勢必全力搶分。狼隊雖然上仗主場擊敗車路士，但佢哋聯賽作客4連敗，今仗隨時打回原形，賓福特主勝比較值博。（Now623周四凌晨3時30分直播）

英超聖誕快車賽程頻密，非常考驗球員體力；賓福特受惠上仗「輪空」，獲得10日時間休息，配合地利優勢，相信表現會有改善。事實上，賓福特喺自己地頭演出一向不俗，近5場聯賽主場取得3勝2負，當中2場敗仗係不敵爭標勁旅阿仙奴、阿士東維拉，實屬非戰之罪，今場遇上不擅作客嘅狼隊，正係搶分好機會，戰意必定高昂。

作客腳軟靠唔住
另一邊廂，狼隊上場以2比1擊敗車路士，主因係對手表現差，浪費唔少入波機會，並非狼隊踢得好。事實上，車路士今季狀態長期低迷，狼隊即使贏到呢支億萬大軍，亦不宜高估。更何況狼隊作客例必腳軟，近4場聯賽作客全敗，包括不敵護級球隊錫菲聯，嚴重削弱作客爭勝信心，面對以逸待勞嘅賓福特，預料將陷入劣勢，賓福特主勝比較值博。