意盃：薩得性起！阿特蘭大捧Ｗ_東方日報

另一場意盃16強由阿特蘭大主場火併薩斯索羅。阿特蘭大連場報捷信心返晒嚟，撞正跌緊Watt嘅薩斯索羅，仲唔趁機踩多兩腳咩，主勝有計！■（周四凌晨1時開賽）

今季表現時好時壞嘅阿特蘭大，近期表現確有回升迹象，各項賽事近5場取得4勝1負，唯一敗仗係輸畀主場超勁嘅博洛尼亞，單計主場阿特蘭大更豪取3連勝，當中更擊敗AC米蘭。一度沉爆嘅前鋒路爾斯梅利爾終於復甦，上月中連續3場意甲加歐霸都有波入，共入4粒，重拾射門鞋。

主場專恰薩斯索羅
相反薩斯索羅近5場未贏過之餘，仲輸咗4場，其中3場更係領先之下反勝為敗，都幾打擊士氣，而且呢班波一向踢法進取，防守問題一直未見改善；連同上屆及前屆在內，薩斯索羅之前4場意盃法定時間未贏過，今屆兩場都係靠互射12碼先至將低組別球隊踢出局，表現認真麻麻。

雖然雙方近年碰頭互有勝負，但若果單計阿特蘭大主場出擊，近7次對薩斯索羅全部贏晒，明顯喺自己地頭剋住對手，今場要法定時間贏波晉級唔難。