英總盃：拖肥水晶宮旺半和追多鋪_東方日報

第3圈重賽再鍊過
英足盃第3圈重賽，愛華頓返主場再鬥水晶宮。上次交手踢成0比0，未分高下，事實上兩隊無論實力同聯賽排名都好接近，今次再交手都係難分勝負，而且包括上次和波在內，雙方近3次交手全開半場和，再追半場和啱數。（周四凌晨3時45分開賽）

根據上次兩隊對賽數據顯示，雙方射門同控球率都非常接近，甚至連角球次數都打和，愛華頓喺末段有卡維特利雲被罰紅牌出場，要10人應戰力守至完場。

卡維特利雲進攻冇料到
今場雖然有主場之利，仲有卡維特利雲紅牌被撤銷可以上陣，但佢上場聯賽對阿士東維拉嘅表現大家有眼見，呢位前鋒今季忘帶射門鞋，近16場只入1球，對上一次入波已經係上年10月，今場仲想靠佢，「拖肥糖」想入波唔係咁易。

水晶宮上次對愛華頓後，有個幾星期休息，球員抖到夠，而陣容亦同上場分別不大，前鋒佐敦阿休暫時離隊踢非國盃嘅空缺，繼續由小將馬菲奧斯法蘭卡補上，但係米高奧利斯傷勢仲未復原，冇咗呢位翼鋒，球隊攻力難免受影響，而且今場仲要作客，相信老帥鶴臣都會穩陣行先，既然雙方對賽旺半場和，不妨再追。