亞洲盃：日本鬥印尼大顯身手_市民日報

今晚亞洲盃D組尾輪，日本硬撼印尼。「藍武士」上輪大意輸波堅肉酸，今遇弱旅誓要大勝重振軍心，但佢哋踢法重攻輕守，連續3場有失波，寧捧3.5球大盤。（HOYTV76台周三晚7時30分直播）

多點開花以攻代守
貴為爭標熱門之一，日本首輪一度陷於苦戰，幾經辛苦先反勝越南4比2，滿以為佢哋經過呢場熱好晒身嚟料，點知上輪鬥伊拉克有輕敵之嫌下，早早落後兩粒，最終以1比2敗陣，11連勝斷纜，令人意外。日前球隊召開會議，隊長遠藤航提出當進攻時，防線要壓前支援，仲話依家最重要唔係戰術，而係球員要拎出對比賽嘅熱情，表明今仗鬥印尼要打爭氣波，重拾霸氣。

雖然三笘薰繼續因傷倦勤，但日本依然鋒力超強，南野拓實、中村敬斗、上田綺世及遠藤航喺今屆亞洲盃已經開齋，久保建英、伊東純也、前田大然等隨時候命，不過門將鈴木彩艷表現不穩，近3仗都未能保持清白之身，主帥森保一惟有以攻代守，難怪近6場有5次開4球或以上，火力全開。

另邊廂，印尼喺次輪爆冷贏越南1比0，結束4連敗之餘，現時與日本同樣喺頭2輪取得1勝1負，重燃出線希望，戰意必堅。不過要留意，印尼之前7場只得1場保持不失，合共失20粒，好難頂得住「藍武士」嘅狂轟猛炸，不過主W太熱冇肉食，轉捧3.5球入球大更划算。