英超：韋斯咸般茅入球騷娛賓_東方日報

今晚另一場早少少開波嘅英超快車，韋斯咸主場火併般尼茅夫。「錘仔幫」雖然啱啱借得曼城中場加雲菲臘斯，但有多名主力傷停或踢太公波而缺陣，影響唔細，般茅一向有前冇後，今仗隨時合演入球騷，捧2.5球大盤更上算。

（Now 622周五凌晨3時30分直播）

查實韋斯咸狀態麻麻，各項賽事近4場只得3和1負未贏過，包括喺英足盃畀布里斯托城踢出局，令人失望。「錘仔幫」主帥莫耶斯日前終於獲得心頭好，借到曼城中場加雲菲臘斯，不過佢久疏戰陣唔慌有態，而且主力盧卡斯柏基達養緊傷，另外摩洛哥雖然喺非國盃剛剛出局，但阿古特亦未必趕及上陣，韋斯咸上場聯賽兩度領先下被錫菲聯逼和2比2，仲有右閘華迪美高法爾被逐要坐波監，「莫天才」自然頭痛。

蘇蘭基近7場轟6球
中下游分子般尼茅夫，自從上年11月中起重上正軌，各項賽事近11場取得8勝1和2負，兩場敗仗只係輸畀熱刺同利物浦，雖敗不辱。主帥伊拉奧拿崇尚進攻，單計近7場就狂轟18粒，淨係箭頭蘇蘭基已經佔咗6球，不過亦失番11粒，全開3球或以上，明顯係有前冇後，打死罷就，加上佢哋仲要搶分護級，遇上轉沉嘅「錘仔幫」必定火力全開，捧入球大最穩陣。