英超：利物浦火猛半場行大運_東方日報

榜首利物浦今晚主場迎戰般尼，「紅軍」上場輸波後優勢大減，對住態沉嘅般尼不容再失，肯定由頭攻到尾，但佢哋有伊巴希馬干拿迪停賽，難保唔失波，睇番利物浦近3場半場全開2球或以上，一於大吉大利，追1.5球半場大。（Now621周六晚11時直播）

利物浦近期喺聯賽、英聯盃同英足盃3線作戰，出現傷停潮，穆罕默德沙拿非國盃受傷至今未愈，近日又有蘇保斯拉爾加入十字軍，上場防線連番「自爆」，結果以1比3輸畀阿仙奴，更有干拿迪食紅牌今晚停賽。不過利物浦勝在火力十足，日本國腳遠藤航已告歸隊，前面仲有達雲紐尼斯、迪亞高祖達、路易斯迪亞斯同加普4大射手壓陣，早段要攻陷般尼防線唔算太難。

般尼近況曳有「球」必應

般尼目前護級形勢水深火熱，可惜佢哋踏入2024年仲未贏過，近4場只得2和2負，依家場場都要搶分，問題係防守太弱，近6場都有失波，其中近兩場上半場已落後兩球，遇上攻力強橫嘅利物浦，捧半場大等發橫財。