西甲：皇馬主場神勇打爆基_東方日報

西甲皇家馬德里主場同基羅納合演榜首大戰。「銀河艦隊」上場補時遭馬德里體育會逼和1比1，未能拉開領先優勢，今場面對主要爭標對手基羅納，唔會再大意，佢哋近6場聯賽主場5勝1和，熱捧主勝。（ViuTV96、Now632周日凌晨1時30分直播）

皇馬上場「馬德里打吡」賽前有雲尼斯奧斯祖利亞熱身受傷，打亂部署，不過臨時頂上嘅巴謙戴亞斯交足貨，為球隊建功領先，可惜守唔到尾，臨完場走漏馬高斯洛蘭迪被追和，痛失兩分。不過皇馬早就適應咗兩位中堅艾達米列達奧同阿拉巴長抖嘅不利因素，好多時以攻代守，祖迪比寧咸（圖）已交出18球8助攻，加上主場成績有保證，仍然秤先啲。

基羅納缺爭標經驗輸蝕
基羅納今季聯賽23場入52球，係西甲「火力王」，今季射入15球嘅烏克蘭前鋒杜夫比克上場對皇家蘇斯達因傷缺陣，但賽前消息話今晚可以候命，可惜球隊近況回落，近3場1勝1和1負，包括西班牙盃作客不敵馬略卡2比3，最重要係球員缺乏爭標經驗，打呢類大賽肯定輸蝕，作客皇馬難有甜頭。