英超：阿仙奴回勇客W扑錘_東方日報

今晚英超上演倫敦打吡，韋斯咸主場硬撼阿仙奴。韋斯咸狀態轉沉，前鋒查洛保雲跌晒Watt，相反阿仙奴回勇3連勝，明顯行緊好運，必定食住個勢搵「錘仔幫」開年，寧買當頭起，一於捧客勝。（Now621及611周日晚10時直播）

韋斯咸近況欠佳，之前6場只得4和2負未贏過，其中3場交白卷，喺英足盃畀英冠仔布里斯托城爆冷踢完出局，上場聯賽又吞曼聯3蛋。

韋斯咸表現下滑
早前頻有士哥嘅前鋒查洛保雲，連續3場食白果，腳風唔順，中場核心盧卡斯柏基達仲養緊傷，對進攻影響甚大。

另邊廂，阿仙奴之前陷入7場僅1勝嘅谷底，包括主場圍攻下仍不敵韋斯咸，信心盡失，好彩喺短暫歇冬期去咗杜拜集訓後，成班波精神面貌唔同晒。阿仙奴近3場聯賽贏晒兼轟入10球，翼鋒加比爾馬天尼利佔咗3粒，重拾射門鞋，夏維斯客串「假9」起到前線支點同串連作用，更重要係上場一度後防自爆被扳平後冇洩氣，最終以3比1擊敗榜首利物浦，士氣大振，依家只落後「紅軍」2分重燃爭標希望，今仗造訪頹爆嘅「錘仔幫」，一定乘勝追擊，客勝熱得有理。