英超：錫菲聯豁出去半大收禮_東方日報

今晚英超頭場，包尾大幡錫菲聯主場硬撼白禮頓。錫菲聯護級形勢危殆，近期亦豁咗出去，經常一開波即搶攻，但佢哋防守差勁，遇上嗜攻嘅「海鷗」，隨時初段就有大手交易，1.5球半場大捧得過。（Now 621周日晚10時直播）

錫菲聯今季24輪聯賽只得13分排包尾，未計今輪賽事，落後「安全線」尾4球隊7分，護級形勢水深火熱。錫菲聯暫時3場勝仗，都係主帥韋達上年12月回巢後先至取得，進攻係有一定改善，佢深明不能再坐以待斃，近期採取先發制人嘅策略，希望趁對手初段未站穩陣腳，一開波即搶攻博偷雞，但呢招唔係次次都得，急於搶攻亦令後防自暴其短，各項賽事近5場全部半場開2球或以上，不過依家為搶分冇得諗咁多。

白禮頓主帥崇尚進攻
另邊廂，白禮頓近期表現飄忽，各項賽事近6場只得3勝1和2負，只有1場冇失波，其中作客慘吞盧頓4蛋最肉酸，上仗領先下又反輸畀熱刺，真係估佢唔到。「海鷗」主帥迪薩比崇尚進攻，加上「三球王」三笘薰傷愈歸隊增添火力，面對包尾大幡，更加肆無忌憚搶攻，佢哋近4場亦有3次半場開2球或以上，兩軍1月喺英足盃碰頭，白禮頓落後2球情況下，半場前連追兩粒，最終反勝5比2晉級，可見大家初段即入局，一於捧半場大。