英超：紅軍勇銳吼半W_東方日報

榜首嘅利物浦今日早場作客賓福特，「紅軍」早就適應冇咗穆罕默德沙拿嘅踢法，呢名埃及射手缺陣對利物浦影響唔算大，前線有足夠人手，加上佢哋下周要應付對盧頓嘅補賽，今場必定速戰速決，等主力休息備戰英聯盃，半場客勝有計。

（Now621及611台周六晚8時30分直播）
其實近排利物浦個勢算唔錯，輸畀阿仙奴只係對方表現太好。穆罕默德沙拿早於一月初離隊踢非國盃，即使之後呢名埃及球星受傷未能為「紅軍」上陣，利物浦仍然取得6勝1和1負，成績未受影響。

喺達雲紐尼斯、迪亞高祖達同路易斯迪亞斯3箭頭組合帶動下，紅軍喺上述8場合共射入22球，攻力無堅不摧，早幾日仲話沙拿已經復操，除咗增強板櫈深度，最重要可以令「三叉戟」冇後顧進攻。

對賓福特例搶韁
另邊廂，賓福特最近雖然擊敗狼隊止血，但今季面對勁旅成績麻麻，之前接連不敵曼城及熱刺，今場對住「紅軍」相信難以抗衡。利物浦近4次對「蜜蜂仔」3次半場領先，加上「紅軍」下周中先對完盧頓，仲要喺英聯盃決賽鬥車路士，爭奪今季首個錦標，預料領隊高普會吩咐球員速戰速決，半場客勝有計。