英超：阿仙奴強鋒搶開半大_東方日報

錫菲聯防線全英超最曳
近期氣勢凌厲嘅阿仙奴，喺周二凌晨作客弱旅錫菲聯，爭標仲有希望今仗唔會腳軟。「兵工廠」近期火力全開，無論組織入波或死球攻勢都頻頻得手，上場對紐卡素上、下半場各入2球後，創下英超「連續7個半場」入至少2球紀錄，今仗揀1.5球半場大抵玩！（Now621及611周二凌晨4時直播）

阿仙奴依家落後榜首利物浦5分，但係踢少1場，爭標仲有希望，加上佢哋近期走勢強勁，聯賽已連贏6場，入球數字仲非常驚人，近4場聯賽狂入18球，表現極為穩定，而且對上7個「半場」都攻入至少2球，可以用一己之力開個1.5球半場大。

耶穌仔辛真高傷愈候命
阿仙奴近期踢法搶疆，爭取盡早奠定勝局後，畀班主力提早休息，近7場聯賽有6次半場總入球開2球或以上，據報今仗有「耶穌仔」加比爾捷西斯、辛真高等主力復出，火力更加得人驚。
至於主隊錫菲聯防線極度鬆散，26場聯賽失66球，係今季英超失波最多球隊，就算喺主場亦冇優勢，近3仗主場狂失15球，加上後防主力賀基迪今仗停賽，阿仙奴大有機會早段就展開「屠殺」，再追1.5球半場大好路。