日乙：綠雉勢頭勁泉力搶Ｗ_東方日報

今日下晝日乙尾場上演強弱懸殊之戰，群馬草津溫泉主場遇上岡山綠雉。群馬草津溫泉唔單止排緊日乙榜尾，今季聯賽仲未開齋，撞正氣勢如虹嘅1哥岡山綠雉，凶多吉少，簡單捧客勝。（周日下午4時開賽）

草津溫泉攻守都唔掂
群馬草津溫泉今季聯賽踢咗5輪未嘗一勝，啱啱經歷3連敗，包括近兩場食白果，攻不銳守不穩，難怪敬陪末席，就算主場出擊亦幫唔到幾多。睇番佢哋近期呢3場敗仗之中，全部都係上半場率先失守，毫無還手之力而落敗，可謂「最肥美嘅魚腩」。

作客嘅岡山綠雉開季已經極速撻着，各項賽事近6場取得5勝1和，氣勢冇得頂，呢6場佢哋全部都係先入波一隊，其中4場保持清白身。若果單計聯賽，岡山綠雉錄得3連勝之餘全部冇失波，演出相當穩陣。加上近3次正面交鋒，岡山綠雉取得2勝1和未輸過，無論近況抑或往績，均凌駕群馬草津溫泉之上，食住近期強勁勢頭，絕對有力反客為主，客勝屬信心之選，不容錯過。