意甲：換帥後火力全開 羅馬入球大手到拿萊_東方日報

今晚意甲焦點戰，萊切主場火併羅馬。萊切雖要為護級搶分，但狀態曳到冇朋友，羅馬自新帥迪羅斯上任後，火力全開，今場作客一樣照攻，2.5球入球大更值博。（Now638周二凌晨零時直播）

未計周日賽果，萊切現時喺聯賽有28分排第13位，但只領先降班區尾3嘅費辛隆尼3分，可見護級形勢相當緊湊。睇番萊切近6場贏得1場咁大把，其餘5場只得1和4負，連護級勁敵維羅納同費辛隆尼都贏唔到，狀態都幾差，加上近4場主場3度落敗，主場出擊亦信唔過。

「雌狼」近13場入29球
相反羅馬自新帥迪羅斯1月尾接手後，各項正式賽事近13場取得8勝3和2負，包括殺入歐霸8強，以及聯賽升上第5位，只係爭「4哥」博洛尼亞3分，重燃爭歐聯入場券嘅希望，新帥效應唔講得笑。迪羅斯一改前任摩連奴嘅保守風格，全面釋放球隊嘅進攻潛力，就算前鋒保羅戴巴拿不時受傷，但呢13場攻入29粒，單計近5場聯賽作客就入咗12球，全開3球或以上，今場2.5球大盤有近2倍必捧之外，客勝亦可兼投。