德盃：利華行運搶盃做大事_東方日報

今晚德盃4強賽事，利華古遜主場對住越級挑戰嘅杜塞爾多夫。利華近期行運行到落腳趾尾，而且喺德盃例火力全開，面對有前冇後嘅杜塞爾多夫，實多波入，3.5球大盤不容錯過。（HOY TV 76台周四凌晨2時45分直播）

杜塞爾多夫鬥攻冇包袱
利華古遜多番末段扳平或反勝對手，包括上場聯賽落後1球下，末段連入兩粒反勝賀芬咸2比1，乘住拜仁又輸波，佢哋喺聯賽已甩開次席拜仁13分，首奪德甲冠軍嘅機會已高唱入雲，今季各項賽事踢咗39場都保持不敗，好運又好波。既然聯賽已坐定粒六，利華有餘力爭逐德盃同歐霸盃，特別係德盃，4強中德甲球隊只係剩番佢哋，係最易爭嘅冠軍，一定唔會腳軟。利華今屆4場德盃贏晒、狂轟19粒，之前因傷抖咗好耐嘅中鋒柏德列舒希克，各項賽事近5場入5粒，重新撻着不容小覷。

杜塞爾多夫雖然係乙組仔，但各項正式賽事9場僅1敗，場場有士哥，攻力唔曳，但要留意佢哋今屆4圈德盃都係面對同級或低組別球隊，場場都有失波，防守不穩，今仗遇強冇心理包袱下，隨時搶攻，入球大有計。