荷甲：後上爭標唔留手 飛燕諾大盤埋到丹_東方日報

星期五凌晨荷甲賽事，「降班膽」禾寧丹主場迎戰勁旅飛燕諾，兩隊波實力同級數相差太遠，主隊近期後防中門大開，而飛燕諾踢法亦係有前冇後，今仗會瘋狂進攻務求大勝，4.5球入球大要捧場。
（無綫myTVSUPER周五凌晨零時45分直播）

飛燕諾落後踢多場嘅燕豪芬10分，爭標仲未絕望，球員戰意依然旺盛，近期聯賽3連勝狂入10球，仲連續兩場總入球開5球或以上。今仗對住實力疲弱嘅禾寧丹，將會全力搶攻務求大捷。
禾寧丹積弱聽炒

另邊廂，禾寧丹距離尾3位置7分但踢少場，數字上確實護級仲未絕望，不過佢哋近況實在太差，聯賽連續11場不勝，主場更慘吞8連敗，想借主場之利搶分，反而會招致連場慘敗，加上近4仗主場狂失18球，包括1比5輸畀榜首嘅燕豪芬，以及2比5不敵奈梅亨，今場開4.5球入球大機會甚高。