英超：防守硬淨唔怕2哥 白禮頓細盤頂住仙_東方日報

英超爭霸3雄鼎立，今晚又到阿仙奴出場，佢哋要作客防守硬淨嘅「海鷗」白禮頓，而且仲要為下星期歐聯對拜仁慕尼黑留力，勢必陷入苦戰。「兵工廠」近期踢法穩陣行先，今場唔似會係激烈駁火，博2.5球嘅入球細先係上算。（Now 621及611周日凌晨零時30分直播）

「海鷗」白禮頓喺迪沙比執教下，進攻同防守都極具效率，佢哋喺主場出擊已連續14場不敗，強如曼城同利物浦造訪佢哋主場都要失分，阿仙奴今場自然唔敢輕率搶攻。

不過，白禮頓近期進攻火力下滑，日本國腳三笘薰等主力受傷，安素法迪又因狀態低迷被雪藏，要撕破阿仙奴防線亦唔容易，白禮頓勝在防守頑強，近5仗主場有4次總入球開2球或以下，就算贏輸都係一、兩球上落。

阿仙奴失球數全英超最少
至於客隊「英超2哥」阿仙奴方面，佢哋能夠同利物浦、曼城咬住，防守力強係最大原因，佢哋目前只失24球，數字係全英超最低，尤其去到季尾衝刺階段，踢法更加趨向穩中求勝，近5場比賽有4場保持不失，聯賽作客亦連續4場零失球，威廉沙列巴同加比爾馬加希斯嘅中路防守滴水不漏。既然兩軍都係靠銅牆鐵壁搵食，呢場2.5球細盤值得捧場。