歐協聯：維拉高一班捧半場W_東方日報

英超歐洲賽唯一希望阿士東推拉，歐協聯4強首回合，先於主場迎戰奧林比亞高斯。奧林比亞高斯係希臘傳統勁旅，不過近排作客唔掂，4場只係贏過1場，維拉主場例必搶韁，近6次主場有5次半場領先，半場主勝玩得過。（Now 645周五凌晨3時直播）

阿士東維拉迎來球隊42年首場歐洲賽4強，球隊喺英超亦排緊第4，領隊艾美利功不可沒，呢位名帥喺歐洲賽戰績顯赫，曾經4奪歐霸，維拉今季征戰歐洲成功，全賴佢哋豐富經驗，令到球隊升上另一層次。

艾美利成功將維拉由中游球隊「升呢」，利用球員長處，加強中場搶截及兩翼側擊，經常令對手中場斷纜或者越位，再以快速反擊入波，奧尼屈堅斯入球數字高企可說明一切。

奧林比亞高斯作客腳軟
如果以歐洲足協嘅歐協聯各地聯賽排名系數比較，英超排第1，希臘只係排20，數據上奧林比亞高斯同阿士東推拉，完全唔同檔次。奧林比亞高斯作客係一大弱點，近4場作客只贏1場，遇正主場踢法進取嘅維拉，好難頂得住主隊狂攻，半場主勝好路。