馬高：拜仁收起屈機絕招 史特加穩勝_星島日報

德甲有拜仁慕尼黑和多蒙特兩隊殺入歐聯4強，實在有點意外，多蒙特就更加叻仔，首回合偷到巴黎聖日耳門雞之後，為德甲取得額外的一個歐聯席位，自己又啱啱好係排得第5成直接受益者，自食其力，令到熱刺和曼聯等英超第5位競爭者諗住躺賺的希望幻滅，令人心涼。拜仁慕尼黑自早前宣布教練杜曹季後離隊後，再將本來中場的甘美治轉打右閘，令到成隊波的攻勢非常立體，更加重現多年不見的屈機招數，利萊辛尼在右路個人突破力強，經常扭入中路於大位起腳射門，又或再跟中路球員互相配合，而家，多埋甘美治疊瓦式助攻，若果對方左閘和協防的球員選擇對辛尼作二人防守，那麼甘美治即會無人看管，後者的傳中準繩度又奇高，令到這個右路組合可以話係無懈的屈機之法。恍如當年地上最強的巴塞隆拿，美斯和丹尼爾艾維斯的右路組合。這種明屈的招式，已絕跡一時，今日重現球壇，實在令我覺得有點「爽」。拜仁能否突破皇馬這幅牆，哈利卡尼能否破黑腳縮命，呢一招絕對係關鍵。

拜仁下周中歐聯次回合作客皇馬，今周德甲作客對住狀態亦一流的史特加，絕對會收盡主力，唔使諗太多，一於買史特加讓平手半球的上盤。馬高