馬高：意大利選人為練兵 新星湧現放眼未來_星島日報

衞冕歐國盃的愛隊意大利今晚登場，對住以意甲中下游球員為主的阿爾巴尼亞，主觀願望衰衰哋都贏番一場，不過講到出線或者爭下冠軍，我就呃唔到自己，真係唔會幻想有乜嘢好結果，但我仍然對住這隊新埋班的意大利充滿好奇，而陣中有一名球員非常值得留意。

上手教練文仙尼唔捨得一班奪標功臣導致意大利缺席上屆世界盃決賽周，這種感情用事的情況在班壇非常普遍，好在上年八月，國家隊交到史巴列提手上，選人就可以完全沒有感情包袱。這名上季帶領拿玻里重奪失落多年的意甲冠軍的教練在最終選人時非常清晰，就係將今次賽事作為練兵之用，26人名單之中，13名球員代表國家隊少於20次，5名後衛更各自得2至3頂喼帽，從這就知道其目標早已放在下屆世界盃。我就對這個決定非常支持，比2016年歐國盃干地選晒一班老將博個八強，其後新意軍因缺乏經驗和磨練而缺席2018世界盃好太多了。

意大利的U19和U17今年都分別贏了歐國盃冠軍，只要今次大國腳中的25歲以下成員打好基礎，當兩批球員6年後都上位，未來幾屆大賽意大利就會好有睇頭。今屆我會望住中堅卡拉科利，這名博洛尼亞中堅能力等同當年沙治奧拉莫斯，值得期待。 馬高