德乙：科隆漢堡均細波_東方日報

德乙開咧鬥穩陣
德乙周六凌晨搶先開咧，兩支喺德甲作賽經驗豐富嘅球隊科隆同漢堡對陣，兩隊都以重返德甲為目標，令呢場開鑼戰更具睇頭。強強對陣多數穩陣為先，兩軍近年對賽亦偏向保守，今仗追中位數3.5球入球細為妙。

（Now643周六凌晨2時30分直播）
科隆上季喺德甲排尾2降班，亦係上季入波最少球隊，攻力疲弱係致命傷，夏天改聘奧地利教練史祖巴領軍，呢位「紅牛系」教練擅長緊迫戰術，雖然短時間內要踢進攻足球唔符合現實，但至少可以做到壓迫對手，令漢堡難以製造攻勢。

神射手缺陣攻力減
漢堡連續多季爭升班失敗，已經成為德乙「山寨王」，今場作客由德甲降班嘅科隆，同樣唔敢怠慢；之不過上季德乙神射手基列素因肌腱傷患缺陣，冇咗呢位王牌前鋒，漢堡爭取入球會困難重重。睇番雙方近4次正式賽事交手，總入球全部開出2球或以下，今場再追3.5球入球細啱數。