阿甲：班菲特作客4連敗 普拉坦斯回勇捧上盤_東方日報

聽朝阿甲直播戲碼，由ＣＡ普拉坦斯主場迎戰班菲特。ＣＡ普拉坦斯狀態有回升迹象，相反班菲特4場不勝陷低潮，加上近年交手畀ＣＡ普拉坦斯食住，ＣＡ普拉坦斯讓平半一於撐上盤。（HOYTV76台周二早上7時直播）

早前表現欠佳嘅ＣＡ普拉坦斯，近3場聯賽取得2勝1負，包括上場憑前鋒馬迪奧比歷堅奴梅開二度，以3比1擊敗一向硬淨嘅防衛者，表現明顯有起色。事實上，ＣＡ普拉坦斯絕對唔驚班菲特，兩軍近5次正面交鋒，ＣＡ普拉坦斯取得4勝1負，其中3次至少贏兩粒，確係格食格。

至於徘徊下游嘅班菲特狀態低沉，頭8輪聯賽只得1勝3和4負，近4場僅得2和2負未贏過，而且呢班波客場例腳仔軟，近4場聯賽作客輸晒兼只入1粒，可見佢哋作客毫無還手之力，造訪剋星ＣＡ普拉坦斯，確係凶多吉少。

萊斯查近5場4開半和
另一場心水阿甲場次，係萊斯查主場迎戰ＣＡ科爾多瓦中央。萊斯查雖然唔叻，但佢哋初段有氣有力之下，總能同對手拉成均勢，近5場聯賽全開半場和，其中4次半場「窿窿」，證明佢哋初段守得兩嘴，對住近8場僅1勝嘅ＣＡ科爾多瓦中央，海軍鬥水兵格局，隨時悶波一場，半場和不妨追多鋪。（周二凌晨1時30分開賽）