英超：車仔乘勇撞爆水晶宮_東方日報

今晚英超8點半場，車路士主場迎戰水晶宮。車路士上場聯賽6比2大破狼隊，全隊打起士氣，今場對住聯賽2連敗嘅水晶宮，勢必乘勇再下一城，加上雙方近6次交手車路士全勝，擺明格食格，主勝咪錯過。（Now622周日晚8時30分直播）

水晶宮連敗冇力還手
車路士上場聯賽表現醒神，其中馬度基連中三元最對辦，佢近日亦順利入選英格蘭國家隊，其實交出好表現仲有進攻靈魂高爾彭馬，全場交出1球3助攻，尼高拉斯積遜亦交出1球1助攻，就連再度加盟嘅祖奧菲歷斯都有進帳，轉會窗關閉前佢哋再簽入查頓辛祖，中前場人腳爆晒棚，不過既然隊波順開，預計主帥馬利斯卡今場唔會大執位，尼高拉斯積遜、馬度基、高爾彭馬繼續正選，爭取士哥。

水晶宮今夏出售進攻主力米高奧利斯，影響頗大，聯賽頭兩輪吞下2連敗，而且係輸畀同級對手賓福特同韋斯咸，表現遠遜預期，今場惡鬥Big6之一嘅車路士，將會更加難打，主帥格拉斯拿希望上場英聯盃大炒諾域治4比0，對球隊有正面作用，尤其係進攻方面，似乎想放手一博，預計今場會多波入，捧主勝之餘，入球大都可兼顧。