西甲：新兵有料到信心爆棚 貝迪斯乘勇搶W_東方日報

周二凌晨西甲賽事，貝迪斯同馬略卡兩支實力分子將會正面交鋒，主場出擊嘅貝迪斯已經連贏兩場，一眾新加盟球星亦表現對辦，球隊上下信心爆棚，地頭出擊會全力爭取3連勝，主勝可期。（Now632周二凌晨3時直播）

貝迪斯開咧5場聯賽只係輸過畀皇家馬德里，近期狀態亦穩步上揚，由巴塞隆拿借用嘅巴西前鋒域陀洛基喺對雷加利斯一役開齋後，上仗輪到阿根廷新兵盧施素梅開二度，贏埋基達菲取得2連捷，新球員迅速融入令球隊戰力大大增強。

近年交手馬略卡未威過
另邊廂，馬略卡上仗1比0小勝皇家蘇斯達，不過今季表現較飄忽，尤其喺入球能力方面明顯不足，5場聯賽只係得3個入波，當中1球係12碼同1球靠對手擺烏龍，火力成疑。睇番兩隊近5次對賽，貝迪斯全勝，近3場更加係派蛋贏波，捧主勝好路。

西乙侯爾斯卡平手盤要捧
今晚西乙方面，中游嘅侯爾斯卡主場對科爾多瓦。雖然侯爾斯卡近兩場都輸0比1，但睇番往績，近4次交手侯爾斯卡全部贏晒，明顯有「格食格」味道，今場開平手盤，捧侯爾斯卡有着數。（周二凌晨2時30分開賽）