女歐聯：皇馬搶位大無畏_東方日報

周四凌晨女子歐聯B組賽事，西班牙勁旅皇家馬德里女足主場迎戰「新丁」川迪女足，呢場係兩隊爭奪出線嘅關鍵戰，肯定希望喺對手身上拎晒3分。皇馬女足一向火力極強，首次戰歐聯分組賽嘅川迪女足亦大無畏，今場好大機會駁火，博3.5球嘅入球大好路。（周四凌晨1時45分開賽）

B組榜首車路士女足公認係出線頂頭大熱，皇馬女足同川迪女足就被睇好爭奪另一出線資格，佢哋目前都係1勝1負，嚟緊連鬥兩場好可能會決定出線權誰屬，爭勝鬥志唔使懷疑。

近4場歐聯轟11球
皇馬女足火力極強，艾巴莉當杜、蓮達卡絲杜等前鋒狀態大勇，上場女子西甲就喺先落後下，連入3球反勝3比1，近3場比賽全勝。皇馬女足近4場歐聯轟入11球，對住車路士女足力戰下僅輸2比3，強大鋒線可以擊破任何球隊防線，今場唔憂冇波入。

川迪女足雖然係首次躋身歐聯分組賽，而且球員平均年齡極低，最老嘅雲多蘭都係得25歲，正所謂初生之犢不畏虎，對住歐洲各地勁旅一樣大踢進攻足球，近6場歐聯有5次總入球開4球或以上，追3.5球大盤係最佳選擇。文:Mic少