歐霸：兩隊防線穿大窿熱刺羅馬演入球騷_東方日報

歐霸盃大戰，英超「神經刀」熱刺主場迎戰意甲名牌羅馬。熱刺今季踢法繼續有前冇後，近期防線更加爆發傷兵潮，以攻代守係唯一出路，今場對住後防一樣咁「性感」嘅羅馬，撐中位數3.5球入球大冇甩拖！（Now 638周五凌晨4時直播）文:工廠仔

熱刺貫徹領隊普斯迪高路大開大合嘅進攻戰術，所以成績都係大起大跌，可以連續2比3輸畀加拉塔沙雷、1比2不敵葉士域治，但作客又有能力大炒曼城4比0，表現好難捉摸，不過唯一肯定係熱刺嘅比賽例牌多波入，近4場比賽有3場總入球開4球或以上。

「雌狼」作客以攻代守
熱刺一對中堅雲迪雲同基斯甸羅美路繼續養傷，門將古里莫維卡里奧日前亦進行手術需要長抖，令疲弱防線漏洞更大，今場想唔失波都好難。不過意甲老牌球會「雌狼」羅馬亦經歷頻繁換帥，至今表現同樣飄忽不定，佢哋近4場賽事失咗8球，條脆弱防線唔好得熱刺幾多，但好彩入球能力仍然保持，今仗以攻代守之下，預計作客會同熱刺合演入球騷，博入球大最好路。