意盃：主場可靠往績佔優 拉素平手盤明益里_東方日報

意大利盃16強重頭戲，拉素主場迎戰拿玻里，兩軍今季成績同樣不俗，論整體實力，意甲一哥拿玻里稍為秤先，但考慮佢哋目標始終集中聯賽爭標，踢本土盃賽可能輪換陣容出副選，不宜高估。加上拉素近8次主場出擊，取得7勝1和，加上近3碰頭，拉素贏兩次，今場開出平手盤，主隊揀得過。（HOY TV 76台周五凌晨4時直播）文:Mic少

拉素現時排意甲第5位，但其實只係落後榜首拿玻里4分，可見兩隊水平旗鼓相當。拉素最大本錢係地利優勢，呢支首都球隊自3月底開始，主場比賽保持不敗，單計今季各項賽事，10場主場取得8勝2和，表現可靠。更何況拉素深知爭奪聯賽錦標難度非常高，所以一向比較重視盃賽，包括2019年捧意大利盃及意超盃冠軍，戰意有保證。

至於拿玻里狀態則稍為回落，近4仗錄得2勝1和1負，雖然當中贏過兩場，但只係同樣以1比0小勝狀態低迷嘅羅馬及拖連奴，表現略欠說服力。

拿玻里鋒線狀態回落
前鋒盧卡古腳風唔順，近4次上陣只入1球，今場可能被收起。基奧雲尼施蒙尼、大衞拿尼斯等副選前鋒質素平庸，難當重任，想攻入拉素大門，並非易事。雙方近3次交鋒，拉素獲得2勝1和，平手盤更值捧場。