Will知足球：「小車仔」未來強勢崛起_星島日報

剛剛果輪車路士喺歐洲賽飛到最遙遠嘅哈薩克，對上艾斯坦拿。領隊馬列斯卡唔想主力球員飛到咁遠，所以都係帶年輕球員去踢。即管睇下，有無邊個「Sharp醒」嘅年輕球員？

連入兩球嘅古奧就唔使多講，始終佢係拉馬西亞青訓，個人能力就一定會有，第一個入球喺右路獨闖龍潭，顯示出佢嘅身體條件真係唔錯。但係位置感真係麻麻哋，佢現身幫助中場搓波嘅次數係少之又少，而背身亦都唔係佢擅長嘅一環，睇下之後可以進步幾多。

要講到最好表現嘅自家青訓就係泰利基佐治，於今季聯賽盃同埋歐協聯已經先後出過。佢1.8米左右嘅身高，畀到我嘅感覺似多蒙特嘅基頓斯，有爆炸力兼鍾意盤扭，過五關斬六將，再去完成射門。雖然佢有時喺決定方面都係較為幼嫩，但係相信喺一隊嘅比賽經驗，絕對可以令佢成長。

始終歐協聯嘅強度唔算特別高，可能比平時隊內友誼賽嘅水平差唔多，不過車路士用到年輕梯隊依然能夠贏波，絕對可喜可賀。Willhappy