英超：賓福特半和頂住白禮頓_東方日報

兩支曾經處於歐洲賽席位嘅球隊，白禮頓同賓福特今晚將會交手。兩軍近況都麻麻，白禮頓近5場聯賽不勝，賓福特各項賽事5場輸4場，雙方都有傷兵影響成績，預料今場唔會太過進取，加上近4次交手3次開半場和，值得再追。（Now 623周六凌晨3時30分直播）

白禮頓季初至到11月都表現平穩，頭12場聯賽只輸2場，曾經同歐聯席位無限接近，不過最近突然大崩盤，近5場聯賽只得3和2負，未計今輪排第10，不過同前6只係相差3分，但過咗今場之後，就要對阿士東維拉同阿仙奴，今場唔可以1分都冇落袋。

「海鷗」成績下滑，同射手韋碧克受傷缺陣不無關係，這名老將為白禮頓射入6球，係球隊首席射手，即使佢哋有三笘薰中場造波，但冇咗一個可靠前鋒接應，始終差啲。

兩軍有隱憂唔敢亂谷
另一方面，賓福特傷兵情況仲大鑊，有多達9名球員受傷，影響球隊調動，近5場輸4場，而且作客係佢哋死穴，今季英超作客8場只得1和7負，呢場係球隊2024年最後一場比賽，相信佢哋都希望最少攞到1分，踢法會冇咁進取，加上佢哋近4次鬥白禮頓，3次半場不分勝負，半場和值得跟進。