意甲：國米超班半W醒里_東方日報

意甲凌晨1點場，卡利亞里主場迎戰國際米蘭，今場牌面強弱懸殊，衞冕嘅國米現時高踞聯賽三甲，落後榜首阿特蘭大3分，但踢少1場，今場勢必傾力求勝，護級球隊卡利亞里肯定擋唔住，睇番雙方近4次交手，國米全部半場領先，半場客勝屬信心之選。（HOY TV 76台周日凌晨1時直播）文:邪神

國米近期走勢強勁，近7場贏6場，當中近兩場聯賽作客都大炒對手，包括贏維羅納5比0，仲要係上半場已經入夠5粒，至於對住前列球隊拉素，一樣照炒6蛋，作客仲贏得多過喺主場比賽，所以今場作客對住卡利亞里，隨時又係大炒格。

國米法國射手馬古斯杜林表現穩定，近況仲勁過隊長拿達路馬天尼斯，今季累積攻入12球同阿特蘭大列迪古並列意甲射手榜首位，佢上場對科木又有「士哥」，腳風甚順，今場對弱旅勢必繼續數胡。

卡利亞里防線失暈
卡利亞里愈踢愈沉，近期經歷4連敗，包括意大利盃淨吞祖雲達斯4蛋出局，上仗更不敵另一弱旅威尼斯，現時已跌至18位降班區，非常危險。球隊後防勁唔集中，經常早段失守，近4場就有3次半場落後，呢條豆腐防線又點守得住國米？