澳職：鳳凰悉尼射手大火併_東方日報

今日澳職獨腳戲，威靈頓鳳凰主場迎戰FC悉尼；論近況FC悉尼秤先，畢竟近4場聯賽贏3仗，但要留意3場勝仗都係主場賽事，作客成績未如理想，不宜高估。考慮到FC悉尼各項賽事近5場作客有4次總入球開出4球或以上，寧願博中位數3.5球嘅入球大。（無綫myTV SUPER周三下午2時直播）文:Mic少

威靈頓鳳凰自從上月初開始表現持續低迷，近6場僅1勝5負，上仗主場出擊對阿德萊德聯，踢咗7分鐘就失波，近5場有4次開賽10分鐘內落後，防線球員經常出現精神唔夠集中嘅問題，成為鳳凰一大死穴。球隊唯一亮點係前鋒巴巴路西斯腳風甚順，近8場聯賽上陣射入5球，所以就算威靈頓鳳凰近期頻頻輸波，往往都可以破蛋，預料今仗有力攻破FC悉尼大門。

鋒線鐵三角威力十足
至於FC悉尼取得2連勝，合共轟入7球，前鋒祖羅利、中場沙基錫分別上演「帽子戲法」各入3球，表現非常搶鏡。其中祖羅利以8個入波排射手榜第1位，沙基錫、基利馬拉各有5球進帳，球隊擁有呢個鋒線鐵三角，攻力有保證。不過，FC悉尼失波數字亦唔少，近4場聯賽作客，每場都失2球或以上，所以頻頻出現大比數賽果，入球大值得追捧。