英超：賽程頻密入波唔慌多_東方日報

曼聯今輪英超主場迎戰白禮頓，「紅魔鬼」目前排喺聯賽下半版，落後白禮頓5分。兩隊上場聯賽同樣全取3分，今場當然想再下一城，不過雙方近期征戰頻密，同上場聯賽只係相隔3日，恐怕對發揮有所影響。文:謝德謙

「紅魔鬼」上場聯賽以3比1反勝修咸頓，連同上周日英足盃加時淘汰阿仙奴，今場面對白禮頓已經一周三賽，球員體能負荷極大，今場對住祖奧柏度及三笘薰嘅高速快放，有排頭痕。

韋碧克回歸踢倒戈戰
白禮頓上場憑三笘薰及佐真尼奧魯達下半場入波，作客以2比0擊敗葉士域治，頭號射手韋碧克近期復出，今場倒戈戰意必定十足，主帥靴斯拿亦有更多兵源作調動，有力向主隊帶來麻煩。「海鷗」今季聯賽只輸過4場，相當硬淨，作客奧脫福亦不落下風，考慮雙方近期賽事頻繁，估計今場入波唔會多。