澳職：麥克阿瑟開W振聲威_東方日報

今日下晝澳職獨腳戲，FC麥克阿瑟主場迎戰威靈頓鳳凰。FC麥克阿瑟近4場贏3場，翼鋒積祖魯頻頻有士哥，信心返晒嚟，遇上狀態低沉嘅威靈頓鳳凰，仲唔趁機食住上咩，主勝捧得過。（無綫myTV SUPER周一下午4時直播）文:法達斯維

FC麥克阿瑟開季表現飄忽，首輪狂數珀斯光輝六個一皮，之後6場只得1勝2和3負。好彩佢哋及時振作，由上月中作客擊敗威靈頓鳳凰計起，近6場取得4勝1和僅1敗，當中近4場錄得3勝1負，唯一敗仗係輸畀「1哥」阿德萊德聯，仲要係反勝為敗，有啲唔抵。翼鋒積祖魯今季有6球進帳，單計近4仗入5粒，腳風轉順，謝明亦連續兩場有士哥，攻力有保證。

相反，威靈頓鳳凰愈踢愈沉，近7場輸咗5場，其中4次上半場經已落後，最終亦無法收復失地，近3仗入得1粒咁大把。

鳳凰齋靠巴巴路西斯鋒力弱
再宏觀啲睇，鳳凰今季12輪聯賽只入13球，係澳職火力第二弱球隊，前鋒巴巴路西斯就佔咗6球，其他隊友幫唔到手，亦解釋到佢哋冇乜還手之力嘅原因，造訪狀態回升嘅FC麥克阿瑟，相信凶多吉少。