歐聯：人腳有限阿仙奴細盤最拿手_東方日報

再受傷兵問題困擾嘅英超勁旅阿仙奴，將會喺主場迎戰克羅地亞球隊薩格勒布戴拿模，兩隊實力雖然有明顯分野，不過「兵工廠」近期用有限人腳進行連場惡戰，體能未足以應付全場高強度賽事，預料今場會嘗試穩中求勝，以佢哋今屆6場只失2球嘅強大防守，有力達成目標，博3.5球嘅入球細。

（Now 638周四凌晨4時直播）文:工廠仔

阿仙奴自從進攻主力布卡約沙卡、加比爾捷西斯同尼華尼利受傷後，鋒線人手捉襟見肘，傷兵回歸前要盡量保留實力。阿仙奴目前喺歐聯形勢唔差，最後兩輪贏晒就穩入前8名，今仗主場出擊但求穩陣贏波，唔會浪費氣力爭大勝，隨時見好就收。

薩格勒布戴拿模作客縮住踢
薩格勒布戴拿模仍有機會爭附加賽資格，佢哋喺休戰期間聘用意大利名帥簡拿華路執教，今場係佢首次領軍，最大任務係穩固防守，今場作客多數屯重兵死守。事實上，薩格勒布戴拿模近6次歐洲賽面對英超球隊，總入球全開3球或以下，中位數3.5球嘅細盤可以再追。