英超：中場鬥法勝負關鍵_東方日報

今晚英超重量級對決，曼城主場鬥利物浦。兩軍今季風水輪流轉，未計今輪「藍月亮」僅排聯賽第4，「紅軍」則全力衝冠，但無論雙方排名如何，唯一肯定係會盡全力擊敗對手。文:謝德謙

卡胡辛洛夫未適應成漏洞
今季成績大退步嘅曼城，剛於歐聯遭皇馬「雙殺」掃出局，目前僅餘英足盃及聯賽兩條戰線。主帥哥迪奥拿深知聯賽重要性，今場面對老對手「紅軍」，估計會安排新兵馬莫殊擔大旗，呢位「新沙拿」上輪聯賽對住紐卡素連中三元，明顯已適應英超節奏，有望再次取得入球，但年輕中堅卡胡辛洛夫來投後仍然患得患失，面對客軍星級前鋒，恐怕要交學費。

利物浦上周中憑沙拿及阿歷山大阿諾特入波，作客2比2打和維拉，叫做保住1分。聯賽嚟到直路階段，即使要兼顧多條戰線，但主帥施洛都冇得諗，必定精銳盡出。雖然荷蘭射手加普因傷未必趕及上陣，仲有沙拿及迪亞高祖達承擔入球重任。「紅軍」近3場每仗至少攻入兩球，同時全部都有失波，今晚雙方中場搶截尤其重要，如何減少後防壓力，將成勝負關鍵。