澳職：阿聯大晒冷爭入季後賽_東方日報

「阿聯」上場險勝鳳凰，成功止血。

今日下晝澳職獨腳戲，布里斯班獅吼主場迎戰阿德萊德聯。獅吼雖然無緣季後賽，反而能夠放開嚟踢，表現唔曳，「阿聯」要搶分爭入季後賽，但踢法有前冇後，今仗隨時合演入球騷，3.5球大盤咪錯過。（無綫myTV SUPER周二下午5時直播）文:法達斯維

獅吼冇嘢爭踢得更放
獅吼今季長期徘徊下游，依家都係排緊尾2，就算仲有6場波要踢，不過已經落後第6位ＦＣ悉尼23分，肯定入唔到季後賽。雖然如此，但獅吼冇晒搶分心理包袱，表現反而好咗，近7仗取得2勝2和3負，其中4仗更先開紀錄，包括上仗爆冷以2比1擊敗西部聯，取得今季聯賽首場主場勝仗，可見佢哋未有因冇得踢季後賽而失去戰意。

另邊廂，季初順風順水嘅阿德萊德聯，2月中至4月中一度經歷8場不勝，其中6仗更輸波收場，上仗對威靈頓鳳凰終於贏3比2止血，但其實佢哋早早領先2粒，直至尾段絕殺才險勝，可見呢班波忽龍忽蟲。

「阿聯」最大問題係攻守嚴重失衡，佢哋踢咗24輪轟52球，係澳職入波第二多球隊之一，但失波高達54粒，入埋都唔夠輸，單計近5場作客有4次開4球或以上，造訪咁搶韁嘅獅吼難保清白身。排第7嘅「阿聯」落後第6位ＦＣ悉尼僅1分，為爭踢季後賽必搏盡，今仗實多波入。