日職：不死鳥起飛受讓抵玩_東方日報

日職周中開快車，上演多場賽事，榜首京都不死鳥將會作客大阪飛腳，論整體成績，「一哥」不死鳥明顯佔優，尤其是近7場作客取得6勝1負，加上要爭標，鬥心一定強，京都不死鳥仲有得受讓平半，下盤值博。（無綫myTV Super周二下午2時直播）

飛腳頹勢冇攻力
大阪飛腳排14位，表現持續低迷，上仗吞ＦＣ東京3蛋，近7場聯賽只有1勝2和4負，當中4場敗仗都冇波入。最離譜係早前日聯盃對乙組球隊水戶蜀葵，法定時間打和0比0，要踢到加時先至險勝1比0，可見大阪飛腳攻力甚為疲弱，更加難以對京都不死鳥防線構成大威脅。

另邊廂，京都不死鳥上仗以2比1擊敗ＦＣ橫濱，近8場聯賽取得6勝1和1負，發揮非常穩定。前鋒拉費爾伊利亞斯近5次上陣，射入5球，加上今季已入4球嘅中場奧川雅也，有5次助攻嘅原大智，不死鳥攻力有保證，要撕開大阪飛腳防線，並唔困難。由於不死鳥僅領先第2位鹿島鹿角2分，兼踢多對方1場，為保住榜首位置，必定搏盡，有力反客為主。