歐霸盃：波杜基林特主勝好路_東方日報

歐霸4強次回合，波杜基林特人造草球場係列強「地獄」，佢哋近5場歐霸主場全勝，今仗必握主場之利追落後。熱刺近6場作客輸5場，今仗仲有占士麥迪臣長抖缺陣，推介波杜基林特主勝。

（Now 638周五凌晨3時直播）文:渡邊年

波杜基林特首回合因為傷停問題，半支主力缺陣，最終輸1比3，教練洛特臣賽後話，輸3粒就真係唔使踢，依家仲有價講。

近5場歐霸主場全勝
波杜基林特最大威力，係佢哋嘅主場阿斯普米拉體育場。球場位於北極圈內，所以唔能夠用真草，呢個係人造草場，好多歐洲球隊嚟到都唔適應，波軍近5場歐霸主場全勝，先後擊敗拉素、奧林比亞高斯同川迪等球隊，而且全部以2球距離取勝，難怪波杜基林特教練都話有信心追番。

另外，波杜基林特主力前鋒安達斯希馬臣、中場柏德列貝治及伊維贊全部停完賽復出，相反熱刺有占士麥迪臣提早收咧，呢名英格蘭中場為熱刺喺歐霸貢獻3個入球及3個助攻，冇咗佢影響好大，雖然孫興民或趕及今場復出，不過狀態成疑，加上熱刺作客近6場輸5場，波杜基林特主勝好路。