英超：般茅維拉搶分大作戰_東方日報

今晚英超尾場爆發歐戰資格搶分戰，排第8嘅般尼茅夫主場迎戰第7位阿士東維拉，般茅上輪反勝阿仙奴，重燃歐戰希望，今主場將主動出擊；維拉經歷連場惡戰洗禮後，今場勢必火力全開，2.5球嘅入球大好路。（Now 621及611周日凌晨零時30分直播）文:邪神

般茅臨近季尾狀態回升，近5場錄得2勝3和走勢，包括上場半場落後劣勢下反勝阿仙奴2比1，逐續逼近歐戰區域，其中前鋒法蘭斯高艾雲尼臣近5場攻入3球，安東尼施美安近5場亦交出2入球1助攻，加上天才中堅甸恩古積臣上場對阿仙奴亦有入球進帳，再睇般茅已連續6場主場有波入，相信呢個入球走勢可以繼續。

維拉冇福仔都夠殺
維拉近期經歷歐聯及英足盃出局，聯賽又輸畀曼城，3條戰線全部失利，好彩上場對富咸嘅「6分波」獲勝，及時止跌，仍保持爭奪歐聯入場券機會，雖然「福仔」拉舒福特繼續養傷，但射手奧尼屈堅斯、進攻中場馬高阿辛斯奧、約翰麥甘尼狀態當弗，加上佢哋近5場作客全開3球或以上，今場同般茅爭奪歐戰資格大駁火，入波唔會少。