日本聯賽盃：三箭客Ｗ盡顯蜂芒_東方日報

頂流分子愈戰愈勇
日本聯賽盃附加賽首回合，福岡黃蜂主場迎戰廣島三箭。前屆盟主黃蜂近況突然轉沉，近10場僅1勝，而且只係贏低組別對手，對日職同級球隊成績為4和5負，今場難免睇淡；2022年冠軍三箭屬聯賽爭標分子，現時排第5，近6場5勝，狀態甚佳，加上近5次交手三箭取得4勝1和，擁有極大優勢，客勝屬信心之選。（周三晚6時開賽）

黃蜂開季3連敗後一度反彈，打出一段8勝1和強勁走勢，不過其後無以為繼，近9場聯賽錄得4和5負未贏過，近期唯一勝仗係日聯盃贏日乙下游球隊富山勝利，而佢哋喺今屆日聯盃前3圈，只係先後贏過FC琉球同櫪木SC兩支低組別球隊，今場附加賽對住喺日職有力爭標嘅三箭，將遇上真正考驗，但以黃蜂近況實在難以樂觀。

受過教訓絕不輕敵
三箭連續3季躋身聯賽三甲，實力有保證，雖然佢哋季初要分心出戰亞冠盃二，因而令表現一度下滑，但到近期已經回復勇態，近6場聯賽贏5場士氣高昂。三箭上輪聯賽對另一勁旅川崎前鋒，戰至補時失守輸1比2，痛定思痛之下，相信今場作客黃蜂唔會大意輕敵。而且日本國家隊今次點兵，只係徵召咗三箭門將大迫敬介，其餘主力都可應付今場附加賽，加上對賽往績有利，預期三箭可在首回合先下一城，客勝值得捧場。