日聯盃：谷盡體力對抗三箭 黃蜂半場和撐得住_東方日報

今日上演4場日聯盃附加賽次回合，其中焦點戰係廣島三箭主場對福岡黃蜂。被睇低一線嘅黃蜂於首回合爆冷贏波，預期三箭今仗會傾巢反撲，好彩黃蜂防守頂得兩嘴，尤其係比賽初段特別集中，半場和值得捧場。（周日下午2時開賽）文:法達斯維

雖然三箭係日職前列分子，但黃蜂於首回合將士用命之下，喺主場爆冷贏1比0，取得近8場以來第2場勝仗，令士氣大振。因此，可以預計實力明顯秤先嘅三箭，今仗返回主場一定瘋狂喪攻，不過黃蜂勝在防守夠晒集中，尤其係比賽初段好氣好力之下，的確能與強敵周旋，單計近6場有5次同對手半場打和，而呢5次半場全部開出0比0，證明黃蜂初段防線密不透風，今仗作客必定以保住1球領先優勢為大前提，先鞏固防守，半場應該頂得住。

三箭狀態飄忽又慢熱
至於主場嘅三箭之前一度打出5連勝，走出亞冠二用錯違規外援而被判大敗嘅陰霾，不過佢哋近2場又全部輸晒，似乎狀態再度回落，首回合久攻不下有辦你睇，就算今仗打算傾巢而出，唔係話你想攻就一定攻得入嘛。何況三箭向來表現慢熱，近9場亦有7次開半場和，而呢7次都係開出波膽「窿窿」，今場要撕破黃蜂嘅鐵桶陣絕對唔易，半場和捧得過。