Ｕ21歐國盃：幼獅破柙半場克敵_東方日報

衞冕第1擊去到盡
今晚U21歐國盃B組賽事，衞冕嘅英格蘭U21強勢登場對捷克U21。「幼獅兵團」坐擁多位英超新星，整體實力超班，上屆就以6戰全勝「無敵」姿態奪冠。佢哋今屆首度出擊，預料會盡力速破捷克U21大門，務求用一場漂亮勝仗展開衞冕之旅，直取半場客勝。

（周五凌晨3時開賽）文:Mic少

英格蘭U21今次大軍名單粒粒皆星，包括為利物浦贏得英超冠軍嘅「孖寶」中場哈維艾利洛及中堅查洛爾昆沙、曼城中場占士麥艾迪、紐卡素後衞利夫拿文度、以及阿仙奴前鋒尼華尼利等猛將，當中利夫拿文度更已進身大國腳，前中後三線質素相當有保證。

捷克U21陪跑交學費
英格蘭U21今屆繼續由「光頭主帥」卡斯利執教，上屆佢哋捧盃之路充滿說服力，6場贏晒兼不失1球，其中5場半場已經領先，相信卡帥會延續呢種「閃電戰」風格，盡快爭取入波擊潰對手，令球隊可以控制戰局。

另邊廂，捷克U21只屬陪跑分子，過去4次打入U21歐國盃決賽周，都係分組賽出局，包括上屆3戰1勝2負，其中以0比2不敵英格蘭U21。捷克隊內大部分球員效力本土聯賽球隊，較出名係效力德國球會漢堡嘅中場卡拉碧斯，無論大賽經驗或平時比賽水平，都唔可以同英格蘭眾將相提並論。尤其今晚首度登場，捷克球員早段隨時因為怯場導致犯錯，令「幼獅兵團」有機可乘。