世冠盃：法式旋風席捲玫瑰碗球場 PSG強勢贏畀你體_東方日報

世冠盃B組巴黎聖日耳門硬撼馬德里體育會，PSG挾歐聯、法甲及法足盃「三冠王」氣勢出戰，近5戰獲得全勝，歐聯捧盃後更有約10日時間休息，球員體力及心態都獲得調整。「床單兵團」超過3星期冇比賽，狀態有待提升，而且球隊離開主場成績只係一般，今場可以向主勝投信心一票。（周一凌晨3時開賽）文:臻贏特

值得一提，今場喺洛杉磯玫瑰碗球場舉行，呢個球場係1994年世界盃決賽場地，當年巴西同意大利120分鐘踢成0比0，互射12碼階段巴治奧一飛衝天，將冠軍拱手相讓畀「森巴兵團」嘅經典一幕，就喺呢度發生。

今場PSG鬥馬體會應該都會同樣激烈，B組係其中一個「死亡之組」，同組仲有南美自由盃盟主保地花高，以及有主場之利嘅西雅圖海灣者，每場勝負甚至每個得失球，都隨時影響出線。

巴黎聖日耳門成為今屆世冠盃奪標熱門係理所當然，事實上根據以往世冠盃往績，歐聯冠軍大多成為終極盟主，心理上有一定優勢。軍情方面，PSG球星奧士文尼迪比利，因傷缺陣法國嘅歐國聯賽事，世冠盃預計亦會喺第3場分組賽先至能夠上陣，不過佢嘅位置由剛奪得歐國聯冠軍嘅葡萄牙前鋒干卡路頂替，加上有基華拉斯基利亞、域天拿等，進攻能力仍然相當夠做。

馬體會狀態成疑
另邊廂，馬德里體育會最後一場賽事，已經係上個月25號，球隊有3星期冇比賽，球員久疏戰陣之下狀態成疑。「床單兵團」雖然舊年曾經喺歐聯嘅聯賽階段，憑補時入波2比1絕殺過PSG，不過兩軍教練以往交手成績，安歷基以9勝2和4負力壓施蒙尼，加上PSG鬥西甲兵往績不俗，格食格之下，推介主勝。