世冠盃：多蒙特弗爆劫富響頭炮_東方日報

賽前增兵決心十足
世冠盃F組賽事，巴甲勁旅富明尼斯對德甲嘅多蒙特，兩支勁旅近況都唔錯，激戰可期。多蒙特喺尼高高華執教下，今年成績全面起飛，世冠盃前又簽入英格蘭新星祖比比寧咸增強實力，決心極大。多蒙特實力上秤高富明尼斯一線，信佢哋頭炮開W。（周三凌晨零時開賽）文:工廠仔

多蒙特喺啱啱嗰季德甲表現「低開高走」，直到尼高高華1月底接替紐尼沙軒執教之後，成隊波嘅表現脫胎換骨，下半季強力衝刺搶到歐聯參賽資格，球隊上下信心爆棚。多蒙特近6場比賽全部贏波，包括喺歐聯擊敗過巴塞隆拿、德甲贏利華古遜，遇神殺神。

多蒙特喺世冠盃開波前，成功高價簽入祖比比寧咸，亦留住翼鋒比諾基頓斯，配合埋射手古拉斯進攻，「蜜蜂兵團」火力方面勁有睇頭。多蒙特依家正值強勢，而且球員有成1個月時間休息叉電，今場可以精神飽滿咁出戰，有力爭取喺分組賽打響頭炮。

富明尼斯難應付密集賽程
另邊廂，富明尼斯依家喺巴甲排第6位，連埋盃賽在內連贏4場，陣中有40歲名將堤亞高施華領軍，不過佢哋主力球員平均年紀偏大，未必能夠適應密集賽程，上周簽入嘅委內瑞拉國腳蘇迪爾度，加盟唔夠1星期又受傷缺席世冠盃，只能繼續以原班人腳出戰，今場惡鬥歐洲球隊唔樂觀，客勝值博。