世冠盃：最緊要威唔鍾意留力 拜仁誓做大贏加_東方日報

世冠盃C組尾輪，賓菲加於夏洛特火併拜仁慕尼黑。賓菲加領先第3位嘅小保加3分，對住拜仁不敗就可以出線，不過拜仁向來唔鍾意留力，相信即使2連勝提早出線，今場教練高柏尼仍然會強陣出擊，小組攞盡9分搶首名，讓平半上盤抵玩。（周三凌晨3時開賽）文:渡邊年

賓菲加首戰落後2球之下，力追到2比2同小保加打和，上輪再大勝奧克蘭6比0後手執4分，而另一邊廂小保加1分喺手，預計佢哋可以輕取奧克蘭最終攞4分，所以賓菲加今場對住拜仁不敗就可以出線。

問題係賓菲加整體實力不如拜仁，博摸和又未必守得住，自己主動進攻亦死得更快，戰術進退失據，而且球隊狀態實際上唔算好，上場贏奧克蘭，先至係「雄鷹」近5場第一仗勝仗。

往績贏晒賓菲加
拜仁慕尼黑連贏2場，顯示極佳狀態及心態，佢哋經常贏波贏到球迷心諗「唔使吖嘛？」，好似首戰鬥奧克蘭，半場已經領先6比0，下半場仲要炒到人哋雙位數，完全唔畀面。

今場波情況相同，拜仁已經進身淘汰賽，今場和波其實對雙方都係好事，但如果用番「唔使吖嘛？」呢個概念，你就會明，拜仁今場一定唔會留手，力爭榜首出線，始終拜仁班高層非常好勝，球迷用番呢個心態代入嚟玩波就啱，加上球隊近5次對賓菲加全勝，今場上盤可以放心捧場。