美洲金盃：分組尾輪遇私房菜 加拿大搶分上盤開餐_東方日報

聽朝美洲金盃B組尾輪，加拿大火併薩爾瓦多。加拿大上場臨尾意外失分，出線未穩陣，好彩今場撞正「私房菜」薩爾瓦多，仲唔趁熱食咩？今場加拿大讓球半、兩球，上盤值得捧場。（周三早上10時開賽）文:法達斯維

身為下年世盃東道主之一，加拿大希望藉住今屆美洲金盃作為試金石，睇吓隊波走得幾遠。雖然有拜仁左閘艾方素戴維斯養緊傷，但曾喺英超教波嘅主帥馬殊，今次亦徵召咗戴歷哥尼利斯、約拿芬大衞等外流歐洲球員，佢哋喺B組首輪就毫不留情咁贈咗洪都拉斯6蛋，上場對住庫拉索亦早早領先，點知喺補時失守被逼和，搞到要嘔番兩分出嚟，兩戰得4分排榜首但未肯定出線，今場唔會輕敵。

薩爾瓦多近兩場食白果
不過薩爾瓦多頭兩輪只得1和1負排包尾，雖然出線未絕望，但以佢哋近兩場都食白果、各項賽事近7場贏得1場，仲要只係擊敗弱旅安圭拉，咁嘅狀態實在好難同加拿大抗衡。翻查紀錄，雙方近3次正式賽事交手，加拿大贏晒之餘，全部都至少贏兩球，擺明格食格，今場贏波晉級冇難度，不妨直取上盤。