世冠盃：祖記曼城輪換捱細界_東方日報

世冠盃G組，祖雲達斯硬撼曼城，雙方同樣2戰2勝已穩奪出線資格，今仗或選擇輪換，留力踢16強淘汰賽，尤其是主辦國美國近日受熱浪侵襲，氣溫非常高，難免會影響球員發揮，可能拖慢比賽節奏。兩軍近5次對賽有4次總入球開2球或以下，寧願博中位數2.5球嘅入球細。

（周五凌晨3時開賽）文:Mic少

兩隊已出線無謂踢殘
兩隊同分，得失球亦一樣，由於祖雲達斯入多1球，所以打和都可以獲得小組首名，今場冇必要贏波，可以歎慢板。事實上，呢支意甲球隊前2場分組賽取得大勝，主因係對手艾阿恩同韋達卡薩白蘭卡實力太弱，不宜作準，今仗遇上英超豪門曼城，恐怕難以佔到甜頭，加上近況大勇嘅翼鋒法蘭斯高干斯卡奧有傷在身，上陣成疑，亦削弱「祖記」攻力。

至於曼城早前簽入3位新兵卓基、雷恩達斯及艾洛利，相信領隊哥迪奧拿會盡量安排佢哋更多上陣時間，以便加快融入球隊，3人今場有機會一齊擔任正選，但未必有足夠默契。

值得一提，曼城後衞歷高利維斯首場分組賽對韋達卡薩白蘭卡，因飛剷踢中對手頭部，被球證出示紅牌趕出場，唔只上仗自動停賽，更加被追罰坐多2場「波監」，意味無緣今場及下場16強賽事。曼城為免再有球員停賽或受傷，今仗應該會點到即止，無謂因小失大。