世冠盃：重拾霸氣速戰速決 曼城半Ｗ拉唔住_東方日報

世冠盃16強戰火延續，聽朝早有場好戲碼，奪冠熱門之一嘅曼城同沙特豪門希拉爾爭入8強。「藍月亮」今屆世冠盃重拾霸氣，分組賽3戰全勝狂轟13粒，火力相當驚人，對住16強唯一亞洲代表希拉爾，兩隊實力有明顯差距，曼城可以輕鬆控制戰局，實行速戰速決爭取早段入波，一於熱捧半場主勝。（周二早上9時開賽）文:工廠仔

曼城喺世冠盃前積極增兵，簽入卓基、雷恩達斯及艾洛利等新兵，亦有外借兵卡迪奧艾捷維利歸隊，連同傷愈嘅洛迪卡斯簡迪，陣容非常鼎盛。「藍月亮」今屆世冠盃踢法極具侵略性，經常喺開賽早段狂轟猛炸，3場分組賽都喺頭10分鐘內就搵到入波，總計近5場賽事，全部喺上半場領先，踢法異常搶韁。

曼城除咗實力凌駕對手，仲有一個優勢，就係佢哋喺今場比賽地點奧蘭多已經成個星期，上場正正喺呢個球場以5比2大炒祖雲達斯，球員已經熟晒場地同當地氣溫，有助佢哋更快入局，以艾寧夏蘭特、謝利美杜古及菲爾科頓組成嘅鋒線，預計大把搵食機會。

希拉爾隊長缺陣更難捱
沙特豪門希拉爾喺意大利名帥施蒙尼恩沙基執教後，表現轉趨四平八穩，同以往崇尚進攻嘅踢法有明顯改變。佢哋近2仗都保持不失，不過對手只係薩爾斯堡及帕丘卡之流，今場對住火力澎湃嘅曼城，完全係兩個世界，加上隊長沙廉艾達沙尼上仗重傷要抖幾個星期，實力再受削弱，今場難望全身而退，曼城一於「趁佢病攞佢病」，早早打破缺口等對手冇得翻身，推介半場主勝。