女歐國盃：意大利女足乘勇追擊葡軍_東方日報

女子歐國盃B組，葡萄牙女足對意大利女足，魚腩球隊「葡女」上仗慘吞5蛋，士氣及信心大受打擊之下，更加惡唔出樣。反觀意大利女足上場旗開得勝，勢必乘勝追擊，一旦贏波就有望提早出線，戰意有保證，加上「意女」近4場比賽取得3勝1和，客勝值博。（周二凌晨3時開賽）文:Mic少

葡萄牙男足屬於世界一級勁旅，但女足發展時間尚短，今屆只係第3度參加女子歐國盃決賽周，前兩屆都係分組賽出局。葡萄牙女足上仗對西班牙女足，開賽7分鐘迅速失兩球，最終大敗0比5，如非西班牙女足上半場已領先4球，下半場留力應戰，恐怕「葡女」唔只輸5球，大敗一場後士氣跌至谷底，今場又遇上狀態大勇嘅意大利女足，前景相當悲觀。

葡萄牙士氣跌谷底
意大利女足上場雖然僅以1比0小勝比利時女足，但其實全場有17次射門，比對手多7次，踢法非常進取，今仗遇上小組最弱嘅葡萄牙女足，更加會放膽搶攻。由於「意女」最後1場分組賽將惡鬥勁旅西班牙女足，當然要把握機會喺「葡女」身上全取3分，奠定出線基礎，以免夜長夢多，相信有力再下一城。